Amfamalik Vaidida

Rfanara vai ini ne, “Vai Fordata. Snain ovi byas, veka minovak ne, vai ini naran a wol ka’i kena tevek rala naran a tali nuhu isa watan na’a Tnebar, velik ne vai boku rna’a vali, wean vai Yamdena Timur, vai Selaru, vai Seluwasa ovu Makatian. Vai Fordata ini bisma tfalak ia ne, 'Vai Seira-Larat-Fordata', na’uk ngoan a wol ka’i manminak. Ba amfanara ia ne, 'Vai Fordata', tevek wan rivun na’a Tnebar ba’i rala vai Fordata. Faliak 'Vai Fordata' rpakai ma mnanat roak na’a Tnebar lolan a. Tamata ra rfalak vali ne, Fordata neluk ‘Didalan’, atau wan ma tamata ovi rala vai Fordata rfalak adat na’a.

Vai Fordata ngoan a (logat) rsialing ma dawan ira tali wahan a nti wahan, ovu ntali ahu nti ahu, na ngoan a rsialing vali ira. Ngoan (logat) irua nangrebat urun (Fordata-Larat ovu Seira). Na’a Fordata-Larat, na ngoan a (logat) rsialing vali ira. Ba amfanara ngoan (logat) avyai ne, Fordata-Larat 1, Fordata-Larat 2, ovu Molo-Maru. Na’uk tamata ra rfalak ne, inar ma rala ngoan (logat) Fordata-Larat 1 al rangrihi tevek wol ka’i susa.